СОМОН ЭЙР ИМКОНИЯТҲОИ ВАСЕЪ НАМУДАНИ ПАРКИ ҲАВОПАЙМОҲОРО БО ШИРКАТИ AVIATION CAPITAL GROUP (ACG) БАРРАСӢ НАМУД

Ширкати ҳавопаймоии "Сомон Эйр" бо намояндагони ширкати “Aviation Capital Group” (ИМА) – яке аз бузургтарин иҷорадиҳандагони ҳавопаймоҳои тиҷоратии ҷаҳон музокирот баргузор намуд. Вохурӣ бо ноиб-президенти ширкати мазкур оид ба маркетинг Cláudio Cheinquer ба дурнамои рушди парки ширкатамон бо ҳавопаймоҳои нав бахшида шуда буд.

Дар рафти музокирот лоиҳаҳои дурнамо оид ба зиёд намудани ҳавопаймоҳои ширкати ҳавопаймоии “Сомон Эйр” аз ҳисоби ҳавопаймоҳои замонавӣ мавриди баррасӣ қарор гирифт. Намояндаи ACG фаъолияти ширкати ҳавопаймоиро баланд арзёбӣ намуда, ба обрӯю эътимод ва рушди устувори он ишора намуд. 

Музокирот дар таҳкими муносибатҳои шарикӣ қадами муҳим буда, барои ҳамкории дарозмуҳлат дар самти навсозии парки ҳавопаймоӣ имкониятҳои навро мекушояд.